منتجآتي برعآية : The Body Shop

بسم الله الرحمن الرحيم

مرحبا صبآيا ، كيف حالكم ؟ ان شاءالله تكونوا بألف خير ، =)

عزيزاتي ، اليوم راح اتكلم منتجات اشتريتها من بودي شوب ، وراح اقول لكم تجربتي معاها

يلا نبدأ حبيبآتي :$

هذه هي مجموعتي وعباره عن : مقشر بالملح ، زبدة شيا ، مشط خشبي ، مرطب يدين ، جل شاور بالفرآوله
وعطر أنآنيآ ، وليفه :)

رآح أتكلم أول شي عن المقشر + الليفه <3
المقشر عباره عن : مقشر الملح للجسم ، هو منظف ومقشر للجلد
 والأملاح المقشرة الصغيره خفيفه ع الجسم وتحسين تعطيك حياة جديده للجلد وتشيل لك الجلد الباهت والميت وتنقيه 
وتتركه ناعماً وليناً ، نصيحه : استعمليه من مره إلى مرتين بالأسبوع لنتجيه مرضيه وسريعه
مو أكثر عشان اذا سويتيه اكثر من مرتين راح تشيلين الجلد النظيف ويسبب لك تجاعيد من بدري واسمرار =(
ريحته منعشه وتحسين كأن ريحة بحر ماادري كيف اوصفه لكم :p بس جميله الريحه ، سعره معقول بـ 99 ريال

الليفه / بتساعدك بالتقشير وبنفس الوقت راح تنشط لك الدوره الدمويه =) ، صحيح اول ماآشتريتها تضايقت منها لان حسيتها قآسيه بس حطيتها بمويه حاره ومع تكرار الاستعمال صارت لينه معاي ورضيت عليها وعجبتني كثير

طريقة استخدامك للمقشر مع الليفه : حطيه ع الجلد الرطب مباشرة بعد الشور
 ودلكيه على الجلد بأطراف أصابعك وبحركات دائرية من تحت لفوق او تستخدمين الليفه وركزي 
على المناطق القاسية والجافة من جسمك ثم اشطفيه بالمويه بتلاحظين بأن جلدك صار صحي المظهر ونظافه 
لا تستعمليه على الجلد المصاب بجروح أو اذا كنتي شايله شعر جسمك بنفس اليوم

 

نجي اللحين لجل الشاور بريحة الفراوله <3<3
مايحتاج اقول لكم عن الريحه لانها منعشه بس عيبها ماتتطول =( ،يتكون رغوتها بسرعه ، وجميل ، استمتاع بالشور
:$

بعد ماخلصتي من الشور نجي لترطيب الترطيب الترطيب =) ، زبدة الشيآ ، ومعروفه فوائده اللي هي :
أن لها خصائص علاجية للبشرة لا تعد و لا تحصي أهمها إزالة التشققات من الجسم. و تغذي الجلد بفيتامينات ألف وهاء و واو اللي تساعد على منع التجاعيد المبكرة وخطوط الوجه وهي مفيدة خاصة لعلاج تلف الجلد الناتج عن التعرض للشمس بالاضافه الى حمايته من الاشعة الضاره.
 وكثيره فوائدها بس اختصرتها لكم :)

تحطينه ع كامل جسمك والأفضل تخلينه صديقك المقرب لك وتستخدمينه مرتين باليوم ، وبالصباح اذا استخدمتيه لاتنسين تحطين واقي شمس =) راح تحسين برطوبة جسمك وبباي الجفاف :p بس لازم تكوني مهتمه وماتنسين الترطيب

عن نفسي حبيته كثير واكيد برجع اشتريه ان شاءالله =)

<< واضح اني كارفته خخخخخ

هذا مرطب لليدين بريحة الورود المنعشه ،، ترطب يديك كثيير ويخليك كل شوي تشمين يدك هههههههه ، ترطيبه حلو
ودايم بالشنطه اذا حسيت ان يدي جفت حطيته وخصوصا ان جونا متقلب ومنتي عارفه صيف ولا شتاء ويديك تجف
استخدميه وخذي الريحه اللي تعجبك فيه منه انواع كثيره  :)

وبعد مارطبتي جسمك يكون شعرك نشف شوي ، استخدمي هـ المشط الخشبي وأبدئي من أطراف شعرك لما فوق
ومن فوائد هالمشط : انه يمنع حدوث الكهرباء اللي تنتج اذا استخدمنا المشط العادي أو البلاستيك وهالكهرباء راح تقصف لك  اطراف شعرك لكن مع المشط الخشبي ماراح يتكون هالشي ، وأسنان هالمشط تكون وآسعه عشان تمشط لك شعرك بسهوله بدون مايتساقط شعرك ويمعط لك شعرك :p

هذا العطر كثير سألوني عن ريحته ومن وين :$ ،  أحس ريحته تنفع لصباح ، وأسمه عطر أنانيآ ، وتحسفت اني ماأخذت المجموعه كامله ، بس ان شاءالله ارجع واخذ المجموعه كامله ، وثباته توآليت ، بس احس ثباته أطول بشوي ويعلق ريحته بملابسي ، وسعره اتوقع حدود 100 ريال ، جميل كثير هالعطر حبيته =)

وبكذا انتهى البوست ، وأتمنى أكون أفدتكم ولو بالقليل ، وقدمت لكم شيء خفيف عليكم
ياليت تعملون فلو + ريتويت واشتراك بالمدونه راح يكون شرف لي كثير واحاول اقدم لكم كل شي أعرفه وعن تجربه شخصيه ، وأي سؤال اكتبوآ لي هنا أو بالتويتر @_iExquisite_

وصلى الله ع نبينا محمد وعلى آله وصحبه أجمعين =)